Sugrađanin, član popularne grupe “Grčka info”, ovih je dana u šaljivom tonu objasnio zašto ljetovanje u predsezoni ima svojih čari koje teško mogu da nadmaše i jul i avgust.
Svake godine s dolaskom maja i početkom juna na društvenim mrežama bukti stara rasprava da li su oni koji u Grčku putuju van špica sezone zapravo “sirotinja” ili samo pametni ljudi koji znaju da uživaju bez stresa i gužve?
Jedan naš sugrađanin, član popularne grupe “Grčka info”, ovih je dana u šaljivom tonu objasnio zašto predsezona ima svojih čari koje teško mogu da nadmaše i jul i avgust.
– Kažu neki – ma pusti, bijeda, ide van sezone, jadni ljudi – smrzavaju se. A mi – parkiramo gdje hoćemo, ponekad i ukoso na dvije platforme. Provodimo se kao truli bogataši. Voda ne nestaje kao u sezoni, ne skupljamo flaše pored tuša, već samo dođeš i odvrneš, a ono voda vrela – piše ovaj putnik koji sa osmijehom ruši mit o “bijedi predsezone“.
O gužvama na plažama, kaže, nema ni govora. Ako se i desi da vikendom dođe više ljudi, samo uskočiš na taksi čamac i promijeniš plažu bez problema. I trgovci u radnjama su nasmijani i ljubazni, jer nema gužve, pa još i mašu gostima da svrate baš kod njih.
– O čekanju u redu na klopu, pa i u restoranu – to ne postoji. Giros dobiješ u rekordnom roku. Poštuju tvoju iscrpljenost od kupanja u ‘ladnoj vodi’”, priča ovaj naš čovjek.
A da ne zaboravimo – parking je besplatan na svakoj plaži jer uvijek ima mjesta, pa se uštedi i do 200 evra samo na tome. Ležaljke, rezervacije, tuče za mjesto pod suncobranom? “Pluskvamperfekat”, duhovito zaključuje naš turista.
Ako je vjerovati njegovim riječima, čovjek se zapita da li je baš predsezona vrijeme kada se u Grčkoj zaista živi kao bogataš. Bez stresa, bez gužve, uz pun novčanik i osmijeh prodavca. A more – isto, plavo i mirisno, samo za one koji znaju da ga prigrle na vrijeme.
